Ka Jinghok U Blei

Based on the course: The Attributes of God (Lesson 11: The Righteousness of God) by David Hocking. 

U Blei u la kyrkhu ia ngi, bad kat kum ka shithi sha ki nong Ephesos 1:3, U la kyrkhu ïa ngi da ki jingkyrkhu bakynja mynsiem baroh ha ki jaka bneng ha U Khrist.

Ka long ka jingkmen bakhraw ba ngi la ioh ia ki jingkyrkhu U Blei ha baroh ki jingdonkam jong ngi. Hynrei bun na ngi pat ngi long pynban kum kito ki bymngeit – ngi iaid kum ki bymdon eiei, ngi duh mynsiem, ngi shah rem, ngi sngewsih, ngi don ha ki jingpang bad kumta ter ter. Hato ngim pat don kata ka jingsngewthuh ba U Blei u la kyrkhu ia ngi bad u la dep ai lypa baroh ki jingdonkam jong ngi?

Ha kine ki sngi ba mynta, bun na ngi (ki bymngeit bad ki bangeit kumjuh) ngi don ka jingsngewthuh ba ngin ioh ia ka jinghok lyngba ki kam bha jong ngi. Hapdeng ki bangeit, kine ki kam bha ki lah ban long kum ka jingtip khambha ia ka ktien U Blei, ka jingstad jong ngi ban duwai, ka jingiathuh ia kiwei shaphang ka gospel, ka jingleit tista sha ka ing U Trai, ka jingleh bha bad jingai sbun ia kiwei bad kiwei kiwei pat ki kam bha.

Kine baroh ki long kiba bha shibun eh bad ngi dei ruh ban leh ia ki. Hynrei kine kym ym ai jinghok ia ngi. Ka ktien U Blei ka ong ba ngin ym long kiba hok da ki kam bha jong ngi. Ngi long kiba hok (lane la ai ia ngi ia ka jinghok) tang da ka kam bah U Jisu Khrist. Ngin ym long kiba kham hok (ha ka jing nujor jong ngi bad kiwei pat) lyngba ki kam bha jong ngi. Kam pher lada phi la pdiang ia U Jisu Khrist tang shi sngi ne shi snem ne 10 snem ne 50 snem, ka jinghok jong ngi ka shong tang ha U Jisu Khrist.

Rom 3:21-26 ka pyni shai ia ka jinghok U Blei.

Hynrei, mynta, la pynpaw shynna ïa ka hok U Blei khlem ka hukum, ba la phla shai noh ïa ka, da kata Ka Hukum bad da Ki Nongïathuhlypa; kata ka long ka hok U Blei kaba da ka jingngeit ha U Jisu Khrist, ïa kita baroh bad ha kita baroh kat kiba ngeit; namar ym don shuh ka jingïapher; namar baroh ki la leh pop, bad ki la duh lehnohei ïa ka burom ka jong U Blei; ïa kiba la pynksan ei da ka jingaiei jong u keiñ, da kata ka jingsiewspah kaba ha U Khrist Jisu; ïa uba la buh paw U Blei ban long ka jingpynïasuk da ka jingngeit ha ka snam jong u, ban pynpaw ïa ka hok jong u, na ka bynta kaba map ïa kita ki pop ïa kiba la leh mynshuwa, ha ka jingïaishah ka jong U Blei; ïa ka ban pynpaw ïa ka hok jong u ha kane ka por kaba mynta, ba un long u bahok, bad uba pynksan ruh ïa uta uba don ka jingngeit ha U Jisu.

Kaei ka jinghok U Blei bad balei ka long kaba kongsan ba ngi don ka jingsngewthuh shai ia ka? To ngin ia puson ia kine.

#1. Ka jingmut jong ka ktien jinghok

Ka jinghok (righteousness), ha ka ktien Hebru jong ka testament barim, ka dei ‘tsedeg’. Kane ka mut kaei kaei kaba beit bad ym kaba kynriang; lane kaei kaba dei ym kaei ka bymdei. Ha ka Grik jong ka testament bathymmai kane ka dei ‘dikaioo’ bad ha ki jingmut ba pher jong ka, ka jingmut kaba kham ha khmat ka dei ‘ban pynksan [iano iano]’.

Ha baroh ki kitab ka testament bathymmai, haba la pyndonkam ia kane ka ktien ‘dikaioo’ kam ju mut ‘ban pynlong hok’. Hynrei, ha kine ki sngi ba mynta, don bun na ngi ba sngewthuh ba ngi long kiba hok lyngba ki kam bha jong ngi. Ngi kwah ba lyngba ki kam bha jong ngi, kiwei kin iohi bad ai jingiaroh ai burom ia ka jinghok bad jingbha jong ngi.

Uba pynksan ïa u bymman, bad uta uba pynrem ïa u bahok, baroh ar ngut kumjuh, ki long ka jingijli ha U Trai (Proberb 17:15). Ka juh ka kyntein ha ki Hebru kaba mut ‘ka hok’ la pyndonkam ha kane ka dkhot na ka bynta ka ktien ‘pynksan’. Kum ki briew, ngin ym pynlong hok ia u bymman. Bad kumba kane ka dkhot ka ong, kata ka long ka jingijli ha U Trai.

Sa kawei ka nuksa ngin shem na Loukas 7:29. Te uta u paidlang baroh haba u la ïohsngew, bad ki nongkhrong ruh, ki la pynksan ïa U Blei, haba la pynbaptis ïa ki da ka jingbaptis u Ïoannis. Hato kine ki paidbah ki pynlong hok ia U Blei? Em, ym kumta; ki ai ka jingiaroh ba U Blei u long uba hok.

#2. Ka jingsngewthuh na ka liang ka jinglong khuid bad jinglong hok

Salm 92:15. …ïa ka ban pyni ba U Trai u long uba beit [lane ba hok]; u long u mawsiang jong nga,bad ha u ym don ka jingbymhok

Na ka jingsngewthuh ia ka ktien ‘ba hok’, na ka liang ka jinglong khuid bad jinglong hok, kane ka pyni ba ym don jingbymhok ha U Blei.

Hato phi long u briew uba hok? Lane la pynksan bad ai jinghok ia phi da ka jinghok U Jisu Khrist? Kum ki bangeit ha u, ka jinghok jong ngi ka long tang ha U Jisu. Ngam don eiei ha nga ban pynhok ialade bad ki kam bha baroh jong nga kim pynlong hok ia nga namar baroh ngi la leh pop, bad ngi la duh lehnohei ïa ka burom ka jong U Blei; ïa kiba la pynksan ei [ngim shym donkam ban leh ia kano kano ka kam, ngi la ioh ei ia ka jingpynskan] da ka jingaiei jong u keiñ, da kata ka jingsiewspah kaba ha U Khrist Jisu (Rom 3:23-24).

Ha ka khyllipmat ba ngi pdiang ia U Jisu Khrist kum U Nongpynim jong ngi, la pynksan ia ngi ba ngi long kiba hok ha u. Hooid, baroh na ngi ngi dang hap ha ki pop hadien ba ngi wan sha U Khrist, bad ka dei kane kaba phylla shaphang U Trai jong ngi. Kam pher ngi long ki briew kiba kumno ne ki kam aiu ngi la leh, U Trai U Blei u pynksan ia ngi bad ngi long kiba hok lada ngi pdiang ia U Jisu kum U Nongpynim u jong ngi.

Namar ngam sngewlehrain ïa ka gospel U Khrist; naba ka long ka bor U Blei ïa ka ban pynim ïa uwei pa uwei uba ngeit, ïa u Jiw nyngkong bad ïa u Grik ruh. Namar ha ka, la pynpaw ïa ka hok U Blei da ka jingngeit sha ka jingngeit: kat kumba la thoh, “Hynrei, uta u bahok da ka jingngeit un ïoh im.” (Rom 1:16-17).

Da ka jingngeit ha U Khrist, nga long uba hok. Hynrei kane ka hok kam shong ha ki kam bha ki jong nga namar ki hok jong ngi baroh ki long kum ka jaiñ ba bit-tngit (Isaiah 64:6a). Ka hok ka jong ngi ka long tang ha U Jisu bad ha ka jingiap bad jingmihpat ka jong u.

#3. Ki kam bahok U Blei

U Trai u bahok ha la ki lynti baroh, bad uba aiei ha baroh ki jingleh jong u (Salm 145:17). Baroh ki kam U Blei ki long kiba hok. Ha kiei kiei baroh, u long uba hok bad un ym leh ia kano kano ka bym dei ne kaba bakla. U Abraham u da ong ha u, u Nongbishar ka pyrthei baroh kawei un ym leh hok mo? (Jenesis 18:25).

Wat hapdeng ka pop jong ka Jerusalem, shuwa ba kin shah ring mraw sha Babilon, U Trai hapdeng jong ka u long u bahok; un ym leh ïa ka jingbymhok (Sephanaïah 3:5).

#4. Ka jingsngewthuh katkum ka jinglong U Blei

Haba ngi phai na ka liang ka jinglong U Blei, ngi sngewthuh ba ka jinghok U Blei ka long ha ki ar bynta: (i) ka kdew ia ka jinglong U Blei hi. Lada phi tip ba u long u bahok, phi tip ba uwei pa uwei baroh uba ïai-leh ïa ka hok, la kha ïa u na u (1 Ioannis 2:29). Ka jinghok hi ka dei ka jinglong U Blei; ym shim lah ban ai sha u briew ia kane; (ii) ka jinghok ka mut ruh ia kaei kaba U Blei u leh. Ka dei kum kane ka jinghok ba U Trai U Kpa u la pynksan bad ai jinghok ia ngi lyngba ka jingiap and jingmihpat U Trai Jisu. 

Ka kitab u Isaiah 53 ka kren shaphang u Nongpynim, u Shakri bahok U Blei. Un ïohi ïa ka jingtrei shitom ka mynsiem jong u, bad yn pynhun: da la ka jingtip u shakri bahok jong nga un pynksan [yn phla ia ka jinghok] ïa ki babun (11). Namar ba ha une U Shakri ym don pop (1 Pet. 2:22, Heb.4:15, 2 Kor 5:21), ka jingiap jong u ka long tang ia ngi ki nongpop, ym ialade. U la ai ia la ka jingim bahok ban siew kylliang bad ka jingim pop jong ngi baroh. Ym tang ba u la siew kylliang, hynrei ia kito kiba pdiang ia u kum U Nongpynim, u la pynskan ia ki ha khmat U Blei U Kpa bad ai ka jinghok jong u ia ki. Kaei kaba u kwah na ngi? Ka jingngeit ha u bad ia kaei kaba U Trai Jisu u la leh ka ka diengphna.

Haba ngi khmih ia kaei kaba U Blei u la leh, ngi pule ha Rom 3:21 ba la pynpaw shynna ïa ka hok U Blei khlem ka hukum. Ngi lah ban iohi ia ka hok ha ki Hukum bad ki Nongiathuhlypa (the Law and the Prophets) hynrei kine baroh ki kdew sha ka jingngeit ha U Jisu Khrist (Rom 3:22). U Paul u thoh ruh ba baroh ngi la hap ha ka pop hynrei U Blei u la pynksan bad ai ka jinghok ia ngi lyngba ka jingaiei ka jong u. U ai ia ngi ia kaei kaba ngim don hok ban ioh.

Kumno la pyllait ia phi na ka pop? Da ki kam bha jong phi? Em, dei tang da ka jingiap bad jingmihpat U Trai Jisu. Ka jingngeit jong nga bad jong phi kam shym la pynim ia ngi. Dei tang U Jisu Khrist uba pynim ia ngi. Ka jingngeit ka long tang ka dak ban pyni ia ka jingshaniah jong nga ia kaei ba U Trai u la leh. Shuh shuh u Paul u ong ruh ha 2 Korinth 5:21 ba ïa uta u bym shym la tip ïa ka pop, u la pynlong ka pop na ka bynta jong ngi, khnang ba yn pynlong ïa ngi ka hok U Blei ha u.

Ka jinghok ka kdew ia ka jinglong U Blei bad dei tang ma u hi uba khlem pop. Ia ngi baroh kiba ngeit ha u bad kiba la aiti ka jingim ha u, la pynksan bad ai ka jinghok ha khmat U Trai U Blei lyngba U Jisu Khrist.

ïa uba la buh paw U Blei ban long ka jingpynïasuk da ka jingngeit ha ka snam jong u, ban pynpaw ïa ka hok jong u, na ka bynta kaba map ïa kita ki pop ïa kiba la leh mynshuwa, ha ka jingïaishah ka jong U Blei; ïa ka ban pynpaw ïa ka hok jong u ha kane ka por kaba mynta, ba un long u bahok, bad uba pynksan ruh ïa uta uba don ka jingngeit ha U Jisu (Rom 3:25-26).

Ngin ym tip shaphang ka jinghok U Blei lada ngim ioh pule ha ka ktien jong u. U Blei, ha ka jingïaishah bad ka jingshahslem jong u, u la map ïa kita ki pop jong ki riewngeit barim. Ha ka diengphna, la map lut ia kine ki pop baroh. Na ka bynta jong ngi ha kine ki sngi ngi don ka jingpyntngen ba la pynkhuid ïa ngi da kata kaba ainguh ïa ka met U Jisu Khrist tang shi sien ai (Hebru 10:10)

Ngim donkam ban pynhok ialade; ym ba ngi long kiba hok ne kiba bit hynrei namar ba ngi long ki nongpop bad ki batngit ha khmat U Trai uba hok bad uba khiud tam. Ngim don eiei ban ai ne ban leh bad dei tang ka snam U Jisu kaba lah ban pynksan bad pynhok ia ngi ha khmat U Blei uba khuid. 

Mynta to ngin ia phai bad peit ba balei ka jinghok U Blei ka long kaba kongsan. Ngin ia peit ia 7 tylli kiei kiei.

#1. Ka jinghok U Blei ka pynskhem ia baroh kiba U ong.

Kumno ngin shaniah ha U Trai lada um long uba hok? Isaiah 45:22-25.

To phai khmat sha nga, bad to long ba la pynim ki bakut jong ka pyrthei baroh; namar nga, nga long U Blei, bad ym don uwei pat. Ha lade nga la smai, ka ktien ka la mih noh na ka shyntur jong nga ha ka hok, te kan ym wan phai shuh, ‘Ba ha nga, ka khohsiew baroh kan dem khrup, u thylliej baroh un smai.’ “Uwei un ong ha nga, ‘Tang ha U Trai ka don ka hok bad ka bor: ha u hi ki briew kin wan, kita baroh kiba sngewbitar ïa u kin sngewlehrain.’ Ha U Trai yn pynksan ïa u symbai jong u Israel baroh, bad un sngewsarong.

Kine ki dkhot ki kren shaphang ka jingpynim ba U Blei un wanrah ha ki paidlang jong u. Ngin shaniah ha kine ki kyntien namar U Blei u la smai hi ha lade ba ki kyntien ba la mih na u ki long kiba hok.

Ka jingkyllum ka ktien jong me ka long ka jingshisha; bad kawei pa kawei baroh na ki jingbishar hok jong me ka neh junom (Salm 119:160).

Ka hok jong me ka long ka hok kaba junom, bad ka aiñ jong me ka long ka jingshisha (142).

#2. Ka jinghok U Blei ka pyni ia ka jingbishar hok jong u ia ki briew.

Hato don na ngi (ki bangeit bad bymngeit kumjuh) kiba pyrkhat ba U Blei yn ym bishar hok ia ki? Salm 50:4-6 ka ong

Un khot ïa ki bneng sha jrong, bad ïa ka khyndew, ba un ïoh bishar ïa la ki briew: To lum lang ha nga ïa ki riewkhuid jong nga; kita kiba la teh jutang bad nga da ka jingkñia. Te ki bneng kin pynbna ïa ka hok jong u; naba U Blei hi u long nongbishar.

Namar ka jingkhuid bad jinghok U Blei, un bishar hok ia ka pyrthei baroh. U la buh ka sngi ha kaba un sa bishar ïa ka pyrthei ha ka hok  (Ki Kam 17:31)

Ha Jingpynpaw 16, ngi iohi ia ki hynniew tylli ki pliang ka jingbitar U Blei.

Bad uta u balai u la theh noh ïa ka pliang jong u sha kita ki wah bad sha kita ki pukri um; te ki la kylla long ka snam. Bad nga la ïohsngew ïa uta u angel kita ki um ba u ong, “Me long u bahok, uba long bad uba la long, me U Bakhuid, naba me la kut bishar kumne: naba ki la ïa-pynmih noh ïa ka snam ki riewkhuid bad ki nongïathuhlypa, te me la ai ha ki ka snam ban dih: namar ki la kop hi kumta.” Bad nga la ïohsngew na kata ka duwan kaba ong, “Shisha, ko Trai uba U Blei Badonbor Baroh, kiba shisha bad ki bahok long kita ki jingkut bishar jong me.” (4-7).

Ban pyni ia ka jingbishar hok U Blei, la pynkylla snam ia ki um baroh. Ia kiba la pynmih ïa ka snam ki riewkhuid bad ki nongïathuhlypa, ka um jong ki la pynkylla snam.

Lada don mano mano na ngi kiba ong ne pyrkhat ba U Blei um bishar hok ia ki, to kin long kiba kham husiar ha ka ktien jong ki. Lada U Blei u da bishar ho kia ngi, ma ngi baroh ngin hap beit beit sha dujok ding. Em, ngam kwah ia ka jingbishar hok U Blei, nga donkam ia ka jingisynei, jingmap bad jingaiei jong u. Hynrei U Blei jong ngi u long uba khuid bad un bishar hok. Namar ka jinghok jong u, un ym phai lyndet ne klet noh ia ki pop jong ngi baroh – un bishar hok ia kine ki pop jong nga bad jong phi.

Ha ka jinghok bad jingkhuid jong u, U Blei U Kpa u la theh ia ki pop jong ki bynbriew baroh – kiba mynshuwa, kiba mynta bad ki ban sa wan ruh – ha ka jingiap U Jisu Khrist. Lada ngi kyntait ia U Jisu, ngin sa hap ban shah dalade hi ia ka jingbishar hok U Blei. U la plie ka lad bad lynti ia baroh ki briew kane ka pyrthei. Lada ngi kyntait ia u, ym don shuh da kawei pat ka lynti.

#3. Ka jinghok U Blei ka ai jingpynskhem ba yn um klet ia kaei kaba ngi la leh.

Ki briew ki lah ban klet, hynrei U Blei u long ba hok bad yn ym klet. Wat la ym don mano mano ba tip ia ki kam jong phi, U Blei u tip bad yn ym klet namar U Blei um long u bymhok ba un klet ïa ka jingleh jong phi bad ïa kata ka jingieit kaba phi la ïa-pyni sha ka kyrteng jong u, ha kaba phi la shakri ïa ki riewkhuid, bad ba phi ïaishakri ruh (Hebru 6:10).

U Blei um long u bymhok ba un klet ia kiei kiei baroh ba phi la leh. Tang shi khuri ka um pjah ba ai ha ka kyrteng U Jisu, un ioh ka bainong ba bha. U Blei u tip ia phi bad ia ki kam jong phi. U Blei u long uba hok bad ka jinghok jong u ka ai jingpynskhem ia ngi ba wat la baroh ki klet ne kim tip, U Blei hi u tip bad u kynmaw bad un ai ka bainong ba bha ia phi.

#4. Ka jinghok U Blei ka weng noh ia ka jingdonkam ban shaniah ha ka jinghok lade.

Hato phi la kut ki lad ki lynti ha ki kam jong phi ban ai jinghok ialade? Ka jinghok jong ngi bad ki jingleh jong ngi ban ioh jingpynim kin ym wanrah jingmyntoi eiei ruh ia ngi.  

Hangno te ka jingsngewsarong? La khang noh khop ïa ka. Da kano ka rukom? da ka jong ki jingleh? Em keiñ; hynrei, da ka rukom ka jingngeit. Namar kata, ngi ïakut nia noh ba pynksan ïa u briew da ka jingngeit khlem ki jingleh ka hukum. (Rom 3:27-28).

Hato kane ka mut ba ngin ia klet noh ia ki kam bha, ka jingim bha bad jingkhuid jong ngi? Em, ym kumta.

Lada phi ieit ïa nga, to sumar ïa ki hukum jong nga (Ioannis 14:15)

Uta uba don ki hukum jong nga, bad ba sumar ïa ki, uta u long uba ieit ïa nga (21)

Lada uno uno ruh u ieit ïa nga, un sumar ïa ka ktien jong nga (23)

Namar kane ka long ka jingieit ïa U Blei, ba ngi da sumar ïa kita ki hukum jong u (1 Ioannis 5:3)

Hynrei lada phi pyrkhat ba ka ki kam bha jong phi kin kham pynhok ia phi ban ia kiwei pat, phi don ha ka jingsngewthuh bakla kaba khraw. Ka khubor babha U Khrist ka weng lut ia baroh kum kita ki jingsngewthuh. 

Ko parabangeit, ka jingkwah hir hir ka dohnud jong nga bad ka jingduwai jong nga ha U Blei na ka bynta ki Israel ka long, ba yn pynim ïa ki. Namar nga phla shaphang jong ki, ba ki don ka jingsngew-shitrhem na ka bynta U Blei, hynrei, ym katba kum ka jingtip. Namar haba ki long ki bymtip ïa ka hok U Blei, bad haba ki pyrshang ban pynneh ïa ka hok la ka jong hi, kim shym la pynkohnguh ïa lade ha kata ka hok U Blei. Namar U Khrist u long ka jingkut ka hukum ïa ka ban long ka hok ïa uwei pa uwei uba ngeit. (Rom 10:1-4).

Titos 3:4-7 ka pyni ba lada ngi sngewthuh shai ia ka jinghok U Blei bad ngi pdiang ia kata jingim ba u ai, ngim donkam shuh ban dang shaniah ne ban pyrkhat ia ka jinghok lade. 

Hynrei, haba la paw ka jinglehsbun U Blei U Nongpynim jong ngi bad ka jingieit jong u sha u bynriew, u la pynim ïa ngi, ym na ki jingleh ka hok kiba ngi hi, ngi la leh, hynrei, katba kum ka jingisynei jong u, da ka jingsait ka jingkha ar sien, bad ka jingpynthymmai U Mynsiem Bakhuid, ïa uba u la theh noh kyrhai ha ngi, da U Jisu Khrist U Nongpynim jong ngi; ba, haba la pynksan ïa ngi da kata ka jingaiei jong u, yn ïoh pynlong ïa ngi ki nongïoh pateng, katba kum kata ka jingkyrmen ka jingim bymjukut.

U Paul u thoh ka Rom 11:6, te lada ka long da ka jingaiei, kam long shuh na ki jingleh; la ym kumta, kata ka jingaiei kam long shuh ka jingaiei. Ym da ka hok jong ngi ba U Blei u la pynksan bad ai jinghok ia ngi hynrei tang ka jingaiei jong u. U Blei u ai ia ngi ia kaei kaba ngim don hok satia ban ioh bad lada ngi shaniah ha u, ngi iaid katkum ki hukum jong u bad ngi ieng skhem ha u, ngi long kita ki riewhok ha U Khrist.

#5. Ka jinghok U Blei ka aibor ba ngin im ka jingim bahok ha U.

Ngi la iohi ba ngin ym lah ban pynhok ialade da ki kam hok lajong hynrei kata kam mut ba ngin um im hok. Ka jingpynksan bad ai jinghok U Blei ia ngi, ka ai bor ia ngi ba ngin im ka jingim ba hok, ngin iai-leh ia ka hok  bad ba ngin bud bad kohnguh ia ki hukum U Trai.

Lada phi tip ba u long u bahok, phi tip ba uwei pa uwei baroh uba ïai-leh ïa ka hok, la kha ïa u na u (1 Ioannis 2:29).

Ko khun hep, wat ai ïano ïano ruh ba un ïalam bakla ïa phi; jar uba ïai-leh ïa ka hok u long u bahok, kat kumba ma U, U long U bahok (3:7).

Ha kane keiñ, ki la paw kita ki khun U Blei, bad kita ki khun u Soitan. Uwei pa uwei baroh u bym ju leh ïa ka hok um long na U Blei, lymne uta u bymieit ïa la u para (3:10).

Ka ktien U Blei ka long kaba shai ha kane ka jingsngewthuh. Lada phim im ka jingim hok bad phim iai-leh ia ka hok, phim dei ki khun jong U Blei. Bad lada phim dei ki khun U Blei, phi dei ki khun u Soitan.  

Namar ka jingaiei ka jong U Blei ka la paw, kaba wallam jingpynim ha ki briew baroh, kaba hikai ïa ngi, khnang ba haba la len noh ïa ka jingbymriewblei bad ïa ki jingkwah brai ka pyrthei, ngin ïoh im bakhan adkar, bad bahok, bad bariewblei, ha kane ka pyrthei kaba mynta (Titos 2:11-12).

Ma phi, phi long ki sakhi, bad U Blei de, kumno ba ngi la ïaid da ka bakhuid bad bahok bad ba khlem jingrem sha phi kiba ngeit (1 Thessaloni 2:10).

U Blei u thrang bad kwah ia ngi ba ngin im ka jingim bahok. Ka jinglah jong nga ban im hok bad iai-leh ia ka hok ka shong lada nga la pdiang ne em ia U Mynsiem U Blei. Kane ka wan lyngba ka jingpynksan U Blei ia nga. Nga dei ban sngewthuh ba ha U Khrist, nga long uba hok bad lyngba U Mynsiem Bakhuid, nga lah ban im hok bad iai-leh ia ka hok.

#6. Ka jinghok U Blei ka iaroh ia U bad ka ai ia ngi ka jingpynim ha U.

Rom 3:24, ïa kiba la pynksan ei da ka jingaiei jong u keiñ, da kata ka jingsiewspah kaba ha U Khrist Jisu. Ka jinghok U Blei ka iaroh bad burom ia ka jingaiei jong u.

Kumta, kat kumba da kawei ka jingryngkang, kata ka jingkut bishar ka la wanhap ha ki bynriew baroh, ïa ka ban pynrem; kumta ruh, da kawei ka jinglehhok, kata ka jingaiei ka la jia ha ki bynriew baroh, sha ka jingpynksan bad ka jingim ïa baroh. Namar, kat kumba da kata ka jingbymkohnguh jong uta uwei u briew, la pynlong ki bapop ïa kita kiba bun; kumta ruh, da kata ka jingkohnguh ka jong uta uwei pat, yn pynlong ki bahok ïa kita kiba bun. Bad ka hukum ka la rung nalor kata, khnang ba kata ka jingryngkang kan da mih byllien. Hynrei, ha kaba ka pop ka la roi byllien, ka jingaiei ka la roi kyrhai kham tam eh: ba kat kumba kata ka pop ka la synshar sha ka ban pynïap, kumta ruh, kata ka jingaiei kan da synshar noh da ka jingpynksan sha ka ban pynim bymjukut da U Jisu Khrist uba U Trai jong ngi. (Rom 5:18-21).

Ka jinghok U Blei ha baroh kaba ngi shem bad iohi ka iaroh bad ai burom ia ka jingaiei jong u. Ka iaroh ia U Jisu namar dei tang lyngba jong u baka hok U Blei ka wan sha ngi.

#7. Ka dei ka jinghok U Blei ka ban un um pyniakhlad ia ngi na ka jingieit jong U.

Ym tang ba U Blei U plie ka lynti ia ngi ban ioh ia ka jingpynim ha U, hynrei U la pynlong bad pynthikna ba un um don kaei kaei ruh kaba lah ban pyniakhlad ia ngi na ka jingieit jong U. Ngi pule ia kine ki kyntein na Rom 8:31-39.

Kumno te ngin ïa-ong ïa kine kiei kiei ruh? Lada U Blei u long na ka bynta jong ngi, uei uta u ban ïaleh bad ngi? Uta u bym shym la bynnud wat ïa la U Khun jong u hi, hynrei, u la aiti noh ïa u na ka bynta jong ngi baroh, kumno te un ym ai ei lem bad u ruh ïa kiei kiei baroh ha ngi? Uei u ban mudui ïa kiba la jied ki jong U Blei? Dei U Blei keiñ uba pynksan.
Uei uta uba pynrem? Dei U Khrist uba la ïap, shisha kham tam keiñ uba la mihpat ruh, uba long ruh sha ka kti kamon U Blei, uba ïai-ïasaid ruh na ka bynta jong ngi. Uei u ban pynïakhlad noh ïa ngi na kata ka jingieit ka jong U Khrist? ka lanot lane ka shipa, lane ka jingpynshitom beiñ, lane ka jingthngan, lane ka jinglyngkhuit, lane ka jingma, lane ka waitlam? Kat kumba la thoh: “Na ka bynta jong me la dang pynïap ïa ngi baroh shi sngi, la ñiew ïa ngi kum ki langbrot ïa ka jingpynïap.”

Hynrei, ha kine kiei kiei baroh keiñ ngi jop thiaw da uta uba la ieit ïa ngi. Namar nga ngeit skhem ba ka jingïap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh ki ban sa long, lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah keiñ ban pynïakhlad noh ïa ngi na kata ka jingieit ka jong U Blei kaba ha U Khrist Jisu uba U Trai jong ngi.

Lada phi tharai ba phi lah ban duh noh ia ka jingaiei U Blei, phi don ha ka jingsngewthuh bakla. U Blei badonbor baroh u la pynskan ia ngi ha U Jisu Khrist; u la ai ia ka jinghok U Khrist ha kito kiba shaniah ha u. Kumba ngi iohi ha ki dkhot haneng, kane ka pynlong ba un um don kano kano ruh ka ban pyniakhlad ia ngi na ka jingieit jong u. Ka jinglong Khristan kam dei ki briew kiba im ha ka jinghok jong ki. Ka jinglong Khristan ka dei ka jingim ha U Jisu Khrist. Ngi long ki jong u lane ngim long ki jong u; ngi long kiba iai-leh ia ka hok ha u lane ngi long kiba iaileh ia ka hok da ka bor lajong. Ngi hap ban jied iwei na kine, ngim lah ban don lang ha baroh ar jaka.