Ka Jingduwai U Trai

Mathaios 6:9-15; Loukas 11:1-4.

Ko Kpa jong ngi uba ha bneng.

Ngi duwai sha U Kpa ha bneng. U Blei jong ngi U long uba donbor tam halor baroh. U long U nongthaw ia kiei kiei baroh kaba ngi tip bad iohi bad kumjuh ruh ia ki bym lah ban iohi (Kolossai 1:16).

Ka kitab u Isaiah 40 ka thoh shaphang ka jingkhraw U Blei. Ngi pule ha dkhot 12.

Uei ba la thew ïa ki um ha ka lynghoh kti jong u,

bad ba la thew ïa ka bneng da kiba tda,

bad ba la thep ïa ka 'dewmet ka khyndew ha ka pyrha,

bad ba la thew ïa ki lum bah da ka man,

bad ïa ki lum rit ha ka tarajur?

 

Dkhot 26.

To khmied ïa la ki khmat sha jrong, bad to khmih,

uei uba la thaw ïa kine,

uba pynmih noh ïa u paidbah jong ki da kaba ñiew:

u khot ïa ki baroh da ka kyrteng;

da ka jingkhraw ka bor jong u,

bad ba u khlaiñ bor, uwei ruh um jah noh.

Phi lah ban pule ruh ia ka kitab u Job 38 haduh 41 ban iohi shuh shuh ia ka bor bad ka jingkhraw U Blei.

 

Long bakhuid ka kyrteng jong me

Hangne, ka kyntien ‘bakhuid’ ka thew ruh ia ka jinglong kyrpang. Ha ki rukom dustur ki Jiw, khamtam ha ki por ba mynshuwa eh, ka kyrteng ka long kaba shong khia bad kam thew tang ia ka jingpynithuh iano re iano hynrei ka thew ruh ia ka jinglong ba pura jong ki. Haba ngi duwai, ‘long bakhuid ka kyrteng jong me’, ngi phla ba ka kyrteng jong U Blei ka long kaba kyrpang. Ngi phla ruh ia ka jingkhraw ka jong U bad ba ym don mano mano ruh ba iahap ha ka kyrdan jong U. U long uba ha khlieh tam eh. Lada kaei kaei ka don kyrteng, kan hap ban dem ki khohsiew ha khmat ka KYRTENG jong U (Philippi 2:10, Isaiah 45:23).

 

Wan ka hima jong me. Long ka mon jong me ha ka khyndew, kumba ha bneng.

Ka kyrteng U Blei; Ka Hima U Blei bad ka mon U Blei ka dei ban long kaba kongsan tam ha ka jingim jong ngi. Ngi duwai ba ka mon U Blei kan long skhem ha khyndew kumba ka mon jong U ka iaid beit iaid ryntih ha bneng mynta. Ka mon jong U kan iaid bad ialam ruh ia ka jingim jong ngi bad ngin duwai bad iaroh da ka jingkmen haba ngi ong ha U, ‘long ka mon jong me ha ka jingim jong nga’.

 

To ai ha ngi mynta ka jingbam jong ngi kaba ha la ka sngi ka sngi.

Duwai bad pan da ka jinglaitluid bad jingkmen ia ki jingdonkam jong phi kiba man la ka sngi. Da husiar ruh ba ki jingpan jong phi kin ym poi sha ki jingkwah lalot ne jingkwah basniew. Haba phi duwai ia kane, buh ha ki jingmutdur ia ki khun rit haba ki wan sha ki kmie ki kpa ban pan ia ki jingdonkam jong ki.

Ym tang ia ki jingdonkam ha ka jingbam, hynrei ngin duwai ruh na bynta baroh hi ki jingdonkam ki jong ngi kiba man la ka sngi katba kine kin dang long bad iahap bad ka mon U Blei.

 

To map ruh ïa ngi ïa ki ryngkang jong ngi, kumba ngi ruh ngi map ïa kiba leh sniew ïa ngi.

Kumba ngi donkam ia ki jingbam man la ka sngi, ngi donkam ruh ia ka jingmap man la ka sngi. Ngi im ha ka pyrthei kaba la hap ha ka pop bad kane ka pyrthei kan ialam bakla ia ngi bad ngin leh ki marpyrshah ia U Mynsiem (Galatia 5:17). Khlem ka jingiarap bad jingialam U Mynsiem Bakhuid, ngin ym lah ban iaid ha U Mynsiem bad ngin kwah hi ban leh ia ki jingkwah jong ka doh. Ngi donkam ia ka jingmap ba man la ka sngi; bad kumba U Blei u map bad iai map ia ngi man la ka sngi, ma ngi ruh ngi dei ban map ia u para briew man la ka sngi (Mathaios 6:15; Loukas 17:3-4)

  

To wat ïalam ïa ngi sha ka jingpynshoi ruh, hynrei, sumar ïa ngi na ka basniew

Ka jingpynshoi kam mut tang ka jingtyrwa ban leh pop; ka mut ruh ki jingtynjuh. U Blei yn um pynshoi iano iano ruh (Jakob 1:13) hynrei un shah ia ngi ba ngin iaid lyngba ki jingtynjuh bad ki jingeh. Kynmaw ba kata kaba phrang ïa ka jingngeit jong phi, ka pynlong ïa ka jingïaishah (Jakob 1:3). Mano mano ba duwai, ‘to wat ïalam ïa ngi sha ka jingpynshoi’ hynrei ki buh pat ialade ha ka jaka ba wan ki jingpynshoi, ki long kiba la shukor ha khmat U Blei. To ïaleh pyrshah ïa u Soitan, te un phet ïap noh na phi (Jakob 4:7). Haba ngi duwai, ‘to wat ïalam ïa ngi sha ka jingpynshoi’, ngim kwah ban iaid lyngba ki por ka jingtynjuh; ngim kwah ban ioh ia ki jingpynshoi bad ngin um buh ruh ialade ha ka jaka ban wan ki jingpynshoi. Bad kaba kham kongsan kan long ba ngin ym long ki ban pynshoi ia kiwei pat.

 

Naba ka jong me long ka hima, bad ka bor, bad ka burom ruh, ha la ka rta:

Ia kane ka jingpynkut lane doxology, ym shim la shem ha ki jingthoh ba nyngkong tam la ka long ha ka ktien Grik ne ka ktien Latin. La tharai ba ia kane la buh kham hadien khnang ba kane ka jingduwai kan iasyriem bad kiwei pat ki jingduwai jong ki Jiw. Pule 1 Khronikl 29:10-13 ban iohi nuksa na ka jingduwai u syiem Dabid. Wat la katta ruh, ngin ym dei ban khein sting ia kane bad ngin ia pule bad puson ia ka jingmut.

Kumba long kiwei pat ki doxology, ngi pynkut ia kane ka jingduwai da kaba ai burom ia U Blei U Kpa. Ngi phla ba U don ka hok ban long trai ia baroh ki hima ha khyndew bad ha bneng; baroh kiba U la thaw ki long ki jong U hi. Ngi phla ruh ia ka bor jong U hapdeng baroh ki jingthaw. U don ka bor ban leh ia kiei kiei katkum ka mon ka jong U. Ngi phla bad ai sha U ka burom bad jingiaroh kaba tang ma U hi U dei ban ioh.

 

Amen.

Ka kyntien amen ka wan na ka ktien Hebru 'āman bad haba ngi ong ia kane haba pynkut ia ki jingduwai, ka mut ‘to kan long’. Ngi pynkut ia ki jingduwai da ka jingngeit bad jingkyrpad ba U Blei un pynlong ia kaei kaba ngi lah kyrpad.