U Samla Bariewspah

Mathaios 19:16-30, Loukas 18:18-30, Markos 10:17-31.

Une u samla bariewspah u wan sha u Jisu da ka jingsngewthuh ba u long u briew uba hok. Lehse u wan sha u Jisu namar u kwah ba u Jisu un pynksan bad phla ba u dei shisha u riewhok. Lada ia thew ia ka jingim jong u bad kiwei pat, ngi lah ruh ban ong ba u long shisha u briew uba hok.

Nonghikai babha, ngan leh ïa ka babha aïu, ba ngan ïoh ïa ka jingim bymjukut?

U sngewthuh ba u Jisu u long u briew uba bha hynrei um kwah ne um treh ban ithuh ba u Jisu u long ruh u Blei. Lehse dei na kane ka daw ba u Jisu u jubab ia u kumba u jubab.

“Ïa kino?” Haba u kylli ‘ia kino?’, ngi shu tharai ba ka jingsngewmeng jong une u samla ka la wanrah ka jingsarong ha u namar u la mutdur ba kano kano ka hukum ba u Jisu un ong, u lah ban jubab, ‘nga la kohnguh ia kane’. Lehse u Jisu u la tip lypa ia kine ki jingpyrkhat jong u bad namar ba u sngewieit ia u (Markos 10:21), u la kdew tang 6 tylli ki hukum kiba dei ruh tang ki jingiadei para briew. Nga shu pyrkhat ba lada dei ma nga ne ma phi, ngin ia kdew katto katne na ki 613 ki ain u Moses ba ngi tip thikna ba ym don uba lah ban kohnguh.

“Ïa kita baroh nga la sumar na myndang khynnah: don aïu pat ba nga dang duna?

Wat la une u samla u sngew ba u la bat bad konguh ia kine ki hukum –– ngi lah ban ong ba u la bat shisha ia kine ki ain hynrei tang ha ka dak bad ym ha ka mynsiem; bad shisha ym ha ki rukom ba u Jisu u hikai ha ki Jingialap halor u Lum –– u don ka jingsngew kaba dei ba u dang don ka jingduna.

U Jisu te u la iohi lyngba une u samla bad ia ka dohnud jong u. U la ai kawei ka hukum kaba lah ban wanrah ia ka jingkmen bad jingsuk mynsiem ha u. Lada u konguh, un long shisha uba la kyrkhu. Lehse un ioh ki jingkyrkhu kum u Job lane u lah ban long uwei na ki synran ba ia jan bad u Jisu. Lada u kohnguh, ka lah ruh ban long ka un ia don ryngkat bad u Joseph uba na Arimathaïa mynba u tep ia u Jisu. Hynrei la thoh ba haba uta u samla u la ïohsngew ïa kata ka ktien, u la leit noh sngewsih, naba u don shibun ki spah. Hadien kane, ngi khlem shem shuh ia u ha ki jingthoh la baibl.

“Shisha nga ong ha phi, ba ka da eh noh ïa u riewspah ban leit bsut hapoh ka hima ki bneng. Pat ruh nga ong ha phi, ba ka kham jem ïa ka ut ban bsut lyngba ïa ka thliew thyrnia, ban ïa u riewspah ban bsut hapoh ka hima U Blei.” Hynrei, haba ki synran jong u ki la ïohsngew ïa kata, ki la kyndit eh thred, ki da ong, “Haba kumta, uei ba lah ban lait im?” U Jisu te haba u la khmih ïa ki u la ong ha ki, “Da ki briew kata ka bym lah, hynrei, da U Blei kiei kiei baroh ki long kiba lah.”

Ngin ym lah ban ong lada ngi duk ne riewspah lada ngim ia nujor ialade bad uwei pat. Ngi, kiba shong ba sah ha sor Shillong ha une u snem 2022, ngi long kiba duk lada ngi ia nujor bad ki nong America ne Canada ne West Europe ne Japan. Hynrei ngi long kiba riewspah lada ia nujor pat bad kito kiba na katto katne ki ri na Africa. Lada ngi phai tang ha ri India ruh, lada phi ia nujor bad bun kiwei pat ki jaka, ma ngi ha Shillong ngi long kiba riewspah. Te haba u Jisu u ong, “ba ka da eh noh ïa u riewspah ban leit bsut hapoh ka hima ki bneng”, to kynmaw bad husiar ko parabangeit  ba phin ym khein ialade ba phi long uba duk (namar phi ia nujor bad uba riewspah kham ia phi). Baroh ngi long kiba riewspah bad ngin ym lah da lei lei ruh bad wan sha u Khrist ha ka bor la jong. Lada u Blei hi ym plie ki lad ki lynti, ngim ym pdiang satia ia u Khrist. U Jisu u ong ba kane kam lah ban long bad ki briew hynrei bad u Blei kiei kiei baroh ki long kiba lah. Na kane ka daw, ym tang ba ngi dei ban ainguh bad ai burom ia u Blei ia ka jingaiei bad jingpynim ei ia ngi hynrei ngin ainguh ruh ia u ba u shah ia ngi ban wan sha ka khet bakhuid ka jong u.  

Wat sngew lehrain ne sngew ba kam dei ka mon u Blei haba phi don ka spah, khamtam ia kito kiba kham heh spah haba ia nujor bad kiba bun. Ngi pule ha Jenesis 13:2 ba u Abram u la riewbha eh ha ki jingri, ha ka rupa, bad ha ka ksiar. Shuh shuh la thoh shaphang u Issak ha 26:12-13 ba u Isaak u la bet ha kata ka khyndew, bad u la ïoh kynshew ha kata ka snem ïa kaba shispah shah. Bad U Trai u la kyrkhu ïa u. Bad uta u briew u la man bha, bad u la nang kham khraw kham khraw, bad u la nang roi ruh ha ban da u la jia long uba khraw eh.

Ka suk eh ia kiba riewspah (bad kane ka kdew ia ngi ruh) ban shaniah ha ka spah lajong bad ha ki kam bad ki sap ki phong kiba ngi don. Phi lah ruh ban ong ha lade, “Nga long ba riewspah bad ba dap ba biang; nga don baroh kaba nga donkam” Hato phin sngewphylla lada phi tip ba kine ki dei ki kyntein u Jisu sha ka balang Laodikaia (Jpw. 3:17, KhasiCL)?